తెలంగాణ హైకోర్టు తొలి ప్రధాన న్యాయమూర్తిగా ప్రమాణస్వీకారం

2019 జనవరి 01న జస్టిస్ టీబీఎన్ రాధాకృష్ణన్ తెలంగాణ హైకోర్టు తొలి ప్రధాన న్యాయమూర్తిగా ప్రమాణస్వీకారం చేసారు.

• జనవరి 1 నుంచి తెలంగాణ హైకోర్టు ఆవిర్భవించింది. ఉమ్మడి హైకోర్టుకు ప్రధాన న్యాయమూర్తిగా పనిచేసిన జస్టిస్ టీబీఎన్ రాధాకృష్ణన్ తెలంగాణకు కేటాయించబడ్డారు.
• విభజన చట్టం ప్రకారం తెలంగాణ హైకోర్టుకు మంజూరైన న్యాయమూర్తులు 24 మంది. అయితే ప్రస్తుతం 13 మంది మాత్రమే పనిచేస్తున్నారు. వీరితో తెలంగాణ ప్రత్యేక హైకోర్టు జనవరి 1న ప్రారంభం అయింది.
• ఆంధ్రప్రదేశ్ హైకోర్టుకు తాత్కాలిక ప్రధాన న్యాయమూర్తిగా జస్టిస్ సి. ప్రవీణ్‌కుమార్ ప్రమాణ స్వీకారం చేయనున్నారు.
• ఆంధ్రప్రదేశ్ హైకోర్టుకు కేటాయించబడ్డ పలువురు న్యాయమూర్తులు డిసెంబర్ 30న కుటుంబ సమేతంగా అమరావతికి బయలుదేరారు.
• తెలంగాణ బార్ కౌన్సిల్ కూడా జనవరి 1 నుండి విడిగా కొనసాగనుంది. రెండు తెలుగు రాష్ట్రాల బార్ కౌన్సిళ్లకు ఇటీవల ఎన్నికలు పూర్తయి పాలక మండళ్లు ఏర్పాటయ్యాయి.
• ఉమ్మడి హైకోర్టులో  3.4 లక్షల వ్యాజ్యాలు విచారణలో ఉన్నాయి. ఇందులో 30శాతం కేసులు తెలంగాణకు చెందినవే.
• దిగువ కోర్టుల్లో పనిచేస్తున్న న్యాయాధికారుల్లో ఆంధ్రప్రదేశ్‌కు 539 మందిని, తెలంగాణకు 362 మందిని కేటాయించారు. ఈ మేరకు డిసెంబర్ 30న హైకోర్టు న్యాయాధికారుల బదిలీ జరిగింది.
• ఉమ్మడి హైకోర్టులో పనిచేస్తున్న సుమారు 1600 మంది ఉద్యోగుల్ని ఆంధ్రప్రదేశ్‌ పునర్‌వ్యవస్థీకరణ చట్ట నిబంధనల ప్రకారం ఆంధ్రప్రదేశ్‌, తెలంగాణ హైకోర్టుల మధ్య 58:42 నిష్పత్తిలో విభజించాల్సి ఉంది.

నేపథ్యం: 

• నిజాం కాలం నాటి పురాతన ’హైదరాబాద్ హైకోర్టు’ 1956 నవంబరు 1న ఆంధ్రప్రదేశ్‌ హైకోర్టుగా ఆవిర్భవించింది.
• తెలంగాణ రాష్ట్రం ఏర్పాటు తర్వాత తెలంగాణ, ఆంధ్రప్రదేశ్‌‌ల ఉమ్మడి హైకోర్టుగా కొనసాగింది.
• జనవరి 1 నుంచి తెలంగాణ హైకోర్టుగా అవతరించింది.
• ఆంధ్రప్రదేశ్‌‌ హైకోర్టు ఏర్పాటయ్యాక 35 మంది ప్రధాన న్యాయమూర్తులు పనిచేసారు.
• గుంటూరులో ఏర్పాటైన హైకోర్టులో మొదటి ప్రధాన న్యాయమూర్తిగా కొనసాగిన జస్టిస్ కోకా సుబ్బారావు.. హైకోర్టును హైదరాబాద్‌కు తరలించాక మొదటి ప్రధాన న్యాయమూర్తిగా పనిచేసారు.
• 35వ ప్రధానన్యాయమూర్తిగా జస్టిస్ కల్యాణ్ జ్యోతి సేన్ గుప్తా సమయంలో తెలంగాణ రాష్ట్ర అవతరణ జరిగింది.
• రాష్ట్ర పునర్విభజన చట్టం ప్రకారం హైదరాబాద్‌లోనే ఉమ్మడి హైకోర్టు ఏర్పాటైంది.
• తెలంగాణ, ఆంధ్రప్రదేశ్‌‌‌ల ఉమ్మడి హైకోర్టు తొలి ప్రధాన న్యాయమూర్తిగా జస్టిస్ కల్యాణ్ జ్యోతి సేన్ గుప్తా బాధ్యతలు చేపట్టారు.
• తరువాత జస్టిస్ దిలీప్ బి. భోసలే, టీబీఎన్ రాధాకృష్ణన్ ప్రధాన న్యాయమూర్తులుగా పనిచేసారు.